|| رجعت لطفوله للحظه!!

.. لاادري منين ابدأ .. أو منين اتكلم !!.. رجعت اكمل دراستي الثانويه ..!! >>على البركه !! بعد اربع سنين من جلوسي ..بالبيت متخمره !! بخميرة لقمة القاضي !! رجعت ادرس .. ورجعت اذاكر للامتحانات فقط منازل.. احس اني وحده عجوز تبتدي تذاكر !! ماتدري من وين تقرآ او من وين تحفظ .. نسيت كيف الناس تذاكر !! عموماً ..قلت اوك امونه .. ذاكري ماراح تنفعك حافز !! حافز ذي بتخلص .. ومابتدوم لك >> بعد ماكلتها وبلعتها توها تتذكر الدراسه !! ورحت بأول يوم للمدرسه .. احسها فشله وانا اقول مدرسه !! قصدي سكول .. أفضل كذآ صح !! مشي .. مشي .. دخلت المدرسه فإلا اشوف شيآت صغيره ينططون تحتي ..!! ماعرفت وشذآ اللي ينطط تحتي !! فلاحظت أنهم بنآت صغيرات .. مادري انا غلطآنه او اني داخله بمدرسة روضه !! ياناس البنات عليهم مراييل ثانوي ومتوسط !! بس إستغربت وجود بنآت كثيرآت ممن ينقال عليهم ” مشقرين الحواجب ” ليه ؟ انعدمت الثقه بالنفس ؟؟ ولآ خلآص حللتوها !! وقمتوآ تشقرون !!ا لله يكفينآ شر الفتنه .. وشر هاللي يصير من حولنآ .. ماعليه خلونآ بموضوعنآ كنت الغريبه من بينهم لأني كنت لابسه تيور وبلوزه .. إلا البنات يناظروني وملتزمين الهدوء .. صعدت فوق علشان اعرف هل ملفي وصل لهالمدرسه او لأ ,, إلا اتفاجئ إن الخاله جالسه على الكرسي وتمنع من يصعد فوق .. قلت لها أنا بروح للإداره بسألها عن ملفي إلا تمنعني وبقوه .. طيب انا تو جايه بسأل المديره لا اقل ولا اكثر ..ماعطتني حتى وجه ومعطتني ظهر راسها… ” المشكله اني بين نارين ،، ماني عارفه هل انا مقبوله بعد نقل ملفي ولا أصلأً ملفي مانقل واجلس على البلاطه .. وتروح كل مذاكرتي على قل سنع !!” مشيتها للخاله واسلوبها المستفز لأنها اكبر مني واحترامها واجب .. ماعليش .. امونه .. هذي خاله وملزوم عليها انها ماتسمح لأي بنت تخليها تصعد هذي غوانين السكولنزلت .. فإذا اسمع وشوشآت وحش وكلآم عني !! المشكله انهم قليلات أدب يتكلمن وعيونهم علي !! تكلمي مو مشكله لكن نزلي عينك ! مو مشكله تكلمي .. وحشي .. لكن نزلي عيونك عني !! (فالحسنآت بإذن الله جايه لي ) المشكله ان الشي اللي يتكلمن فيه عني !! عموماً ماعليهم شرهه توهم نونآت .. صفرت الصفيره واتبعت غوانينهم !! فإذا بنات يتكلمن أكثر ويقولون .. بروح أسالها هل فعلاً كذا ولا !! لالا لو انها أبله ماوقفت كذا !! كآن هاوشتنا على فصولنآ !! لو انها أبله كآن ماوقفت معنا !! اظن واعوذبالله من الظن ان هالتحشيش كله انهم يحسبوني أبله !! ياليـــــــــــــــــت !! ياليــــــــــــــــــت !! كنت نفضتكم نفضه محترمه .. كنت بأفرض شخصيتي عليك أنتي وياها .. لكن آخ … آآآآخ .. مو مشكله !! اهدي امونه … امونه ريلاكس!! لكن … لكن لهدرجه عمرهم ماشافوآ بنت تدرس منازل وجايه تكلمل دراستها بتنوره وبلوزه !! أنا أستغرب صراحه .. عموماً مشيتها رحت للإداره وقلت للمديره هل وصل ملفي ولا !! قالت وش اسمك كنت بقولها المدام ايمان  .. بس قلت لا ..اعقلي عاد  تراك زودتيها .. عطيتها إسمي .. قالت لا ماوصل تخيلوا !! كنت مذاكره وشفطت .. الكتآب شفط .. وتعبت عمري .. وضحيت بجلوسي قدآم شاشتي .. وعلى امل ان الملف وصل لهم !! وتقول لي ببساطه .. ماوصل !!!! وش بسوي الحين !! قالت لي اصلاً لو وصل بتكونين راسبه في الحاسب لأنك ماجيتي تمتحنين مع البنآت قلت لها ياحرمه ترآني ساكنه في الرياض كيف بالله اجي اطق لي تقريباً اربع كليوآت علشآن حاسب !! مشكله انها صدمتني بأمر الملف .. انه ماوصل وصدمتني بعد أني راسبه بالحاسب !! قلت لها ماعليش .. بس امتحن بقية الموآد وواقفت ..وقالت خلآص .. انتي روحي امتحني بغرفة المدرسآت .. رحت لغرفة مدرسآت وكلهم يظن اني مدرسه احتياطيه تشرف بقاعة الإمتحانآت كنت بتظاهر للحظه اني مدرسه لأ ,, لأ كنت بخلي نفسي موجهه لأن المدرسآت جديدآت ماعمرهم شافوا موجههآت .. ولأن اول مايسمعون بالموجههات يقومون ينظفون المكتب ويمشطون انفسهم ويرتبون الأوراق وهيك من الحركآت فأبغى أشوف كيف بتكون ردة فعلهم لمن يعرفون اني موجهه .. لكن قلت بلاش حركآت مبزره !! .. اعقلي  مو وقت مزحك جلست .. وانتظرت الورقه تجي لي .. راح نص الوقت ماجات ورقه المدرسات طاقينها سواليف ماحد عطاني وجه .. فتكرمت وحده من مدرسات وجابت ورقه لي وامتحنت .. وقلت للمديره انا كنت داخله قسم تفصيل والمدرسه ذي مافيها تفصيل عطيني الحل !! قالت ادخلي فنيه !! لو انها قالت لي ادخلي نسويه قصدي تدبير كنت وريتها السنع على اصوله كنت طبخت لها سمبوسه !! كنت طبخت لها اندومي !! كنت طبخت لها بيضه عيون !! بس آخ … آخ !! فنيه حق بزارين .. لو ان معي صلصآل كآن كملت الوجه الطفولي !! قلت اوك نشوف وش نرسم بس اختي اللي معي تقول لي لجيتي بتطلعين الوانك روحي بعيد عني (منحرجه مني ) طلعت الواني وانا عندها وضحكت.. وش فيها يعني !! فشله !! فشله !! مافيها شيء عادي اصلاً.. قلت لها عندك برايه !!ومسطره سلفيني اياها !!! يوم جيت برسم كنت امخمخ .. ارسم بحر وسفينه !!! او شجره وجبل وشمس بخطوطها!! او خيمه وقدر على الحطب !! لالا برسم كوخ وسياره حمرآ .. لا .. الأفضل أني ارسم سلة فواكه احس اني رجعت طفله للحظه ..!! رسمت ..وخلصت .. وماكآن ودي اعطيها الرسمه.. لأن وقتها بتنبهر من جمآل رسمي >> قصدها العكس .. كآن في نفسي شيء يسحب الرسمه .. تراها تفشل يابنت الحلال احفظي عرق وجهك !! وكآن جانب ثاني يقول لي سلميها وخلصينآ ..تراها عاديه قلت لضميري : بلاش هواش استحوا على وجيهكم عاد.. خلآص .. بسلمها الرسمه وبنفس الوقت منحرجه وبكذا ننتهي من هالسالفه .. أشوف الجانبين راضين .. !! عطيتها إياه وانتهينآ .. وانتهينا من الإمتحانآت .. وعلى البركه نجحت .. على الحافه !! لكن الحاسب .. الحاسب التافه رسبني !! ماعليه .. نختبرها بالدور الثاني .. ماعاد إلا هو يرسبني ..!!